დაკავებულია სტამბოლის მერი, პრეზიდენტ ერდოანის ოპოზიციაში მყოფი ექრემ იმამოღლუ

თურქეთის პოლიციამ დააკავა სტამბოლის მერი ექრემ იმამოღლუ. ადგილობრივი მედია გენერალურ პროკურატურაზე დაყრდნობით წერს, რომ გამოძიება, რომლის ფარგლებშიც მეგაპოლისის მერი და თურქეთის ერთ-ერთი ყველაზე რეიტინგული პოლიტიკოსი დააკავეს, ეხება უკანონო ტენდერებს, თაღლითობას და მექრთამეობას.

ასევე, „ტერორისტებთან“, კერძოდ თურქეთში აკრძალულ „ქურთისტანის მუშათა პარტიის“ პოლიტიკურ ფრთასთან თანამშრომლობას. თურქული მედიის ცნობითვე, სტამბოლის მერის გარდა ეჭვმიტანილია 100-ზე მეტი პირი.

54 წლის ექრემ იმამოღლუ სტამბოლის მერია 2019 წლიდან. წინა, 2024 წლის მარტში ჩატარებულ მუნიციპალურ არჩევნებში ოპოზიციური „სახალხო რესპუბლიკური პარტიის“ კანდიდატმა ექრემ იმამოღლუმ ხმების 51%-ით დაამარცხა პრეზიდენტ ერდოანის „სამართლიანობის და განვითარების პარტიის“ კანდიდატი მურათ ქურუმი.