სილამაზე დეტალებშია – ირინა ტოგონიძე, დიზაინერი, რომელმაც საკუთარი განცდები ხელნაკეთ სამკაულებად აქცია

ხელნაკეთი აქსესუარების სამყაროში სულ უფრო მეტი ავტორი ცდილობს საკუთარი ხედვისა და ემოციების მატერიალურ ფორმად ქცევას. მათ შორის არის ირინა ტოგონიძე, რომლისთვისაც სამკაულების შექმნა მხოლოდ ჰობი ან პროფესია არ არის – ეს საკუთარი განცდებისა და ხასიათის გამოხატვის განსაკუთრებული გზაა.

როგორც თავად ამბობს, სამკაულების შექმნა თავდაპირველად მოყვარულის დონეზე დაიწყო და მის ძირითად პროფესიასთან კავშირში არ ყოფილა. თუმცა დროთა განმავლობაში ეს საქმიანობა მისთვის ბევრად უფრო მნიშვნელოვან სივრცედ იქცა.

„სამკაულების შექმნა დავიწყე მოყვარულის დონეზე. თავიდან ეს ჩემს პროფესიასთან კავშირში არ იყო. მაგრამ მალევე მივხვდი – ეს უბრალოდ საქმე არ იყო. ეს გახდა გზა, რომლითაც ჩემს განცდებს და ხასიათს ფორმას ვაძლევ. ყველაფერი მეგობრების შეგულიანებით და ერთი პატარა სურვილით დაიწყო –  შემექმნა რაღაც ჩემი, განსხვავებული. ნელ-ნელა ეს სურვილი გადაიზარდა ფერად სამყაროდ, სადაც თითოეულ დეტალს თავისი მნიშვნელობა აქვს. ვქმნი ბროშებს, ყელსაბამებს, საყურეებს და სხვა ნივთებს შერეული მასალებით. თითოეულში დევს განწყობა, ემოცია და თავისი პატარა ისტორია“, – ამბობს ირინა ტოგონიძე.

დიზაინერის ნამუშევრები გამოირჩევა მრავალფეროვანი მასალების, ფერებისა და ფორმების შერწყმით. თითოეული აქსესუარი ხელით იქმნება და ავტორის ინდივიდუალურ ხედვას ატარებს, რაც მას მასობრივი წარმოების პროდუქციისგან განასხვავებს.

ირინა ტოგონიძისთვის შემოქმედებითი პროცესი მუდმივი ძიება და ექსპერიმენტია. სწორედ ამიტომ, მისი კოლექციები არა მხოლოდ დეკორატიული ნივთებია, არამედ ემოციების, მოგონებებისა და პატარა ისტორიების მატარებელი დეტალები, რომლებიც ყოველდღიურობას განსაკუთრებულ ხასიათს სძენს.

დღეს მისი ხელნაკეთი აქსესუარები იმ იდეის გამოხატულებად იქცა, რომ სილამაზე ხშირად სწორედ დეტალებში იმალება, ხოლო თითოეულ ხელით შექმნილ ნივთს შეუძლია საკუთარი ისტორია მოუყვეს ადამიანს, რომელიც მას ატარებს.