საქსტატი: 2025 წლის აგვისტოში მშპ 6.6%-ით გაიზარდა

საქართველოს სტატისტიკის ეროვნული სამსახურის (საქსტატი) მიერ 30 სექტემბერს გამოქვეყნებული წინასწარი მონაცემებით, 2025 წლის აგვისტოში წინა წლის შესაბამის პერიოდთან შედარებით, ქვეყნის რეალური მთლიანი შიდა პროდუქტი (მშპ) 6.6%-ით გაიზარდა.

2025 წლის აგვისტოში წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა შემდეგმა დარგებმა: ინფორმაცია და კომუნიკაცია, საფინანსო და სადაზღვევო საქმიანობები, პროფესიული, სამეცნიერო და ტექნიკური საქმიანობები,  ენერგეტიკა და ვაჭრობა.

კლების ტენდენცია დაფიქსირდა მშენებლობის და დამამუშავებელი მრეწველობის  სექტორებში.

ცოტა ხნის წინ, ორმა მსხვილმა საერთაშორისო ფინანსურმა ინსტიტუტმა საქართველოს ეკონომიკის ზრდის პროგნოზი გაზარდა. ევროპის რეკონსტრუქციისა და განვითარების ბანკმა (EBRD) თავის რეგიონული ეკონომიკური პერსპექტივების შესახებ ანგარიშში იწინასწარმეტყველა, რომ საქართველოს მშპ 2025 წელს 7%-ით გაიზრდება, რაც აღმოსავლეთ პარტნიორობისა და კავკასიის ქვეყნებს შორის ყველაზე მაღალი მაჩვენებელია, 2026 წელს კი 5%-მდე შემცირდება.

აზიის განვითარების ბანკმა (ADB) ასევე გაზარდა საქართველოს 2025 წლის ზრდის პროგნოზი აპრილში დაფიქსირებული 6%-დან 7%-მდე. ADB-მ აღნიშნა, რომ 2026 წლის პროგნოზი 5%-ზე შენარჩუნდება.

This post is also available in: English