radiotavisupleba ახალი ამბები 
Reuters-ი ავრცელებს ცნობას, რომ ნატოს საჰაერო პატრულირების მისიის მონაწილე F-18 ტიპის გამანადგურებელმა ჩამოაგდო უპილოტო საფრენი აპარატი, რომელმაც უკანონოდ დაარღვია რუმინეთის ეროვნული საჰაერო სივრცე.
დრონი წელს ამ ქვეყნის ტერიტორიაზე ჩამოგდებული
მეოთხე უპილოტო საფრენი აპარატია, განაცხადა რუმინეთის თავდაცვის სამინისტრომ 16 აგვისტოს.
ნატოს სამხედრო შტაბ-ბინის სპიკერმა, აშშ-ის არმიის პოლკოვნიკმა მარტინ ო’დონელმა განაცხადა, რომ ალიანსი მუდმივად მზადყოფნაშია და მზადაა თავი დაიცვას ნებისმიერი საფრთხისგან.
„კვირის ინციდენტთან დაკავშირებით დამატებითი დეტალები კვლავ გამოძიების პროცესშია, თუმცა დრონი, სავარაუდოდ, რუსულია“, — განაცხადა მან.
ნატოს წევრ რუმინეთს უკრაინასთან 614 კმ-ის სიგრძის სახმელეთო საზღვარი აქვს. ბუქარესტი ბოლო ოთხი წლის განმავლობაში რუსული დრონების მიერ საჰაერო სივრცის მრავალჯერადი დარღვევის შესახებ ავრცელებდა ცნობებს. რუმინეთის თანახმად, შავ ზღვაში საკვანძო სავაჭრო და ენერგეტიკულ მარშრუტებზე განთავსებულია მოტივტივე ნაღმები.
რუმინეთის თავდაცვის სამინისტროს დრონის წარმოშობა არ დაუკონკრეტებია და აღნიშნა, რომ იგი რადარმა დააფიქსირა ქვეყანაში მეზობელი მოლდოვიდან, რუმინეთის სამხრეთ-აღმოსავლეთით მდებარე ქალაქ გალაციდან ჩრდილოეთით 24 კმ-ის დაშორებით შესვლის შემდეგ.
F-18 ტიპის თვითმფრინავმა, რომელიც რუმინეთში განლაგებული ნატოს ესპანური კონტინგენტის ნაწილია, „სამიზნესთან რადიოლოკაციური კონტაქტი დაამყარა და განადგურების ნებართვა მიიღო“, ნათქვამია სამინისტროს განცხადებაში, სადაც ასევე აღნიშნულია, რომ დრონი უსაფრთხოდ იქნა ჩამოგდებული დილის 5:01 საათზე
სამინისტროს ცნობით, განადგურებული დრონის ნამსხვრევები, სავარაუდოდ, ორ სოფელს შორის მდებარე დაუსახლებელ ტერიტორიაზე ჩამოვარდა.
ივლისში, F-16 ტიპის გამანადგურებლის რუმინელმა მფრიმნავებმა საჰაერო სივრცის დარღვევის შემდეგ პირველად ჩამოაგდეს სამი რუსული დრონი უკრაინაში რუსეთის ომის დაწყების შემდეგ დაფიქსირებული ათობით ასეთი შეჭრის ფონზე.
მაისში, მეზობელ უკრაინაზე ღამის თავდასხმის დროს, რუსული დრონი გალაციში საცხოვრებელ კორპუსს დაეჯახა, რის შედეგადაც ორი ადამიანი დაშავდა.
