კობახიძე და ბოჭორიშვილი ერევანში ევროპული პოლიტიკური გაერთიანების სამიტის ფარგლებში ზელენსკისა და სიბიჰას ესაუბრნენ

„ქართული ოცნების“ პრემიერ-მინისტრი ირაკლი კობახიძე და საგარეო საქმეთა მინისტრი მაკა ბოჭორიშვილი 4 მაისს ერევანში ევროპული პოლიტიკური გაერთიანების მე-8 სამიტის ფარგლებში უკრაინის პრეზიდენტ ვოლოდიმირ ზელენსკისა და საგარეო საქმეთა მინისტრ ანდრიი სიბიჰას ესაუბრნენ.

საქართველოს მთავრობის ადმინისტრაციის პრესსამსახურმა განაცხადა, რომ კობახიძესა და ზელენსკის შორის „შეხვედრა“, რომელსაც ბოჭორიშვილი და სიბიჰა ესწრებოდნენ, „უკრაინული მხარის ინიციატივით“ გაიმართა და რომ საუბარი შეეხო „ორ ქვეყანას შორის ურთიერთობებს“. პრესსამსახურის მიერ გამოქვეყნებულ კადრებში ჩანს, თუ როგორ საუბრობს ოთხი თანამდებობის პირი განცალკევებულად.

კობახიძემ ზელენსკისთან საუბარს „მეგობრული“ და „საინტერესო“ უწოდა და ქართველ ჟურნალისტებს განუცხადა: „უკრაინა ჩვენთვის არის მეგობარი ქვეყანა, ჩვენ გვაქვს ტრადიციული ისტორიული მეგობრობა რაც აკავშირებს ჩვენს ქვეყნებსა და ჩვენს ხალხებს, ამას უნდა გავუფრთხილდეთ მაქსიმალურად და ეს იყო მათ შორის ის სულისკვეთება, რომელიც პრეზიდენტს გავუზიარე, დეტალებზე ვერ ვისაუბრებ“. მისი თქმით, შეხვედრის ინიციატორი თავად ზელენსკი იყო.

ზელენსკიმ მოგვიანებით სოციალურ ქსელში დაწერა: „ჩვენს სახელმწიფოებს შორის მართლაც არსებობს გადაუჭრელი საკითხები. მნიშვნელოვანია დიალოგი ყველა დონეზე. უკრაინა ყოველთვის პატივს სცემდა და პატივს სცემს საქართველოს, მის სუვერენიტეტსა და მის ხალხს. ჩვენ გავაგრძელებთ თანამშრომლობას მომავალშიც“.

ცალკე, უკრაინის საგარეო საქმეთა მინისტრმა ანდრიი სიბიჰამ განაცხადა, რომ მან მაკა ბოჭორიშვილთან ცალკე შეხვედრა გამართა. „ჩვენ გავცვალეთ მოსაზრებები ორმხრივ, რეგიონულ და საერთაშორისო საკითხებზე. ასევე განვიხილეთ ევროპული ინტეგრაცია და ევროკავშირის მნიშვნელოვანი როლი გლობალურ საქმეებში. ცალკე ყურადღება დავუთმეთ ორმხრივად სასარგებლო სავაჭრო და ეკონომიკური თანამშრომლობის გაფართოებას. შევთანხმდით, რომ გვექნება შემდგომი კონტაქტი“, – დაწერა მან X-ზე.

მანამდე, საქართველოს მთავრობის ადმინისტრაციამ გამოაქვეყნა ფოტოები, სადაც კობახიძე ზელენსკის ხელს ართმევს, ხოლო სამიტის მონაწილეები ჯგუფური ფოტოს გადასაღებად ემზადებიან.

This post is also available in: