ვერაზე სროლისას დაჭრილი ერთ-ერთი არასრულწლოვანი კლინიკაში გარდაიცვალა

ინფორმაცია მისი გარდაცვალების შესახებ, - რაც თავდაპირველად კლინიკაში მყოფმა მოქალაქემ გაავრცელა, - რადიო თავისუფლებას შსს-ში დაუდასტურეს.

---

სროლა ვერაზე იყო, - სავარაუდოდ, აკაკი შანიძისა და აკაკი ხორავას ქუჩების კვეთაზე.

ფეისბუკზე ერთ-ერთი თვითმხილველი წერს, რომ „ჩაცხრილეს“ არასრულწლოვნები, რომლებიც „დასისხლიანებულები ეყარნენ“.

ადგილზე მობილიზებულია პოლიცია და სასწრაფო დახმარების ავტომობილები. ტერიტორია რამდენიმე ადგილას პოლიციის ლენტითაა შემოსაზღვრული.

არაერთი ნატყვიარი ეტყობა წითელი ფერის „ალფა რომეოს“ მარკის ავტომობილს.

თვითმხილველის, ელენე ქორიძის გავრცელებული ინფორმაციით, „კაცმა მანქანაში მჯდომ 17-18 წლის სამ ბიჭს ცეცხლი გაუხსნა უბრალოდ იმის გამო, რომ იცინოდნენ“, შემდეგ კი „შორიახლოს მყოფ ქალსაც ესროლა“, რის შემდეგაც იგი „მალევე დაიჭირეს.

„იმედი“ აცხადებს, რომ თავდამსხმელმა „დაკავებისას პოლიციელებს შეიარაღებული წინააღმდეგობა გაუწია“.