გომისმთაზე ავტოსაგზაო შემთხვევას ოთხი ბელარუსი ემსხვერპლა, მძღოლი დაკავებულია

გომის მთაზე ავტოსაგზაო შემთხვევის შედეგად ბელარუსის ოთხი მოქალაქე დაიღუპა, 17 პირი კი დაშავდა. მიკროავტობუსის მძღოლი დაკავებულია. ეს ინფორმაცია „სამოქალაქო საქართველოს“ 13 აგვისტოს შინაგან საქმეთა სამინისტროში დაუდასტურეს.

მედიის ინფორმაციით, მიკროავტობუსი გომისმთიდან ოზურგეთის მიმართულებით მოძრაობდა, რა დროსაც მძღოლმა საჭე ვერ დაიმორჩილა, გზიდან გადავიდა და ხევში გადავარდა.

დაშავებულები საავადმყოფოში გადაიყვანეს, სადაც ისინი „ქართული ოცნების“ ჯანდაცვის მინისტრმა, მიხეილ სარჯველაძემ მოინახულა.

მიკროავტობუსის მძღოლი, რომელიც საქართველოს მოქალაქეა და რომელმაც ავარიის დროს მანქანიდან გადმოხტომა მოახერხა, ქობულეთის საავადმყოფოშია მოთავსებული, სადაც საბადრაგო სამსახურის მეთვალყურეობის ქვეშ იმყოფება.

გამოძიება საქართველოს სისხლის სამართლის კოდექსის 276-ე მუხლით მიმდინარეობს,  რაც საგზაო მოძრაობის უსაფრთხოების ან სატრანსპორტო საშუალების ექსპლუატაციის წესების დარღვევას გულისხმობს.

This post is also available in: