ადვოკატ სტავროს გეორგიუს მკვლელობა: მკვლელი დაკავებულია, თუმცა ოჯახი გამოძიების გაგრძელებას ითხოვს

ათენში ცნობილი ადვოკატის, 73 წლის სტავროს გეორგიუს მკვლელობის საქმეზე 28 წლის ეგვიპტელი დააკავეს. ეჭვმიტანილი ამტკიცებს, რომ ადვოკატთან კონფლიქტი მოუვიდა და იგი ცემის შედეგად გარდაიცვალა, თუმცა გამოძიება მისი ჩვენებების ყველა დეტალს ამოწმებს.

გეორგიუს ოჯახი საქმის გამოძიებას დასრულებულად არ მიიჩნევს და სამართალდამცველებს ყველა შესაძლო ვერსიის შემოწმებისკენ მოუწოდებს. მათ შორის, არ გამორიცხავენ, რომ დაკავებული შესაძლოა მკვლელობის უშუალო შემსრულებელი იყოს, ხოლო დანაშაულის უკან სხვა პირი ან სხვა მოტივი იდგეს.

ოჯახის წევრებმა განაცხადეს, რომ გამოძიების ძირითად ეტაპზე დაზარალებულის მხარეს წარმოადგენენ. მათ ინტერესებს სისხლის სამართლის ადვოკატი ნიკოს გალანისი დაიცავს, რომელიც გარდაცვლილის მეგობარი და ნათლიაა.

ადვოკატმა ნიკოს გალანისმა პოლიციის მკვლელობების განყოფილების თანამშრომლებს გაწეული სამუშაოსთვის მადლობა გადაუხადა, თუმცა აღნიშნა, რომ ეჭვმიტანილის დაკავების მიუხედავად, საქმე ჯერ კიდევ არ არის დასრულებული.

ეჭვმიტანილის ვერსია

ბერძნული მედიის ინფორმაციით, 28 წლის მამაკაცი აღიარებს, რომ მკვლელობის საღამოს სტავროს გეორგიუსთან ერთად იმყოფებოდა და მას ფიზიკურად გაუსწორდა.

მისი თქმით, ადვოკატი საერთო ნაცნობების მეშვეობით გაიცნო. ისინი გარკვეული დროის განმავლობაში ერთად იყვნენ, შემდეგ კი 3 სექტემბრის ქუჩაზე მდებარე საადვოკატო ოფისში მივიდნენ.

ეჭვმიტანილის ვერსიით, ოფისში მათ შორის კამათი დაიწყო, რომელიც ფიზიკურ დაპირისპირებაში გადაიზარდა. იგი ამტკიცებს, რომ 73 წლის ადვოკატს რამდენჯერმე დაარტყა, რის შემდეგაც მამაკაცი გარდაიცვალა.

ზოგიერთი ბერძნული გამოცემა ასევე ავრცელებს ეჭვმიტანილის მტკიცებას, რომ კონფლიქტი ინტიმური შეხვედრის შესახებ შეთანხმებასა და თანხასთან დაკავშირებულ დავას მოჰყვა. თუმცა ეს ვერსია მხოლოდ დაკავებულის ჩვენებას ეფუძნება და დამოუკიდებელი მტკიცებულებებით ჯერჯერობით დადასტურებული არ არის.

სწორედ ამიტომ გამოძიება ამოწმებს, ხომ არ ცდილობს ეჭვმიტანილი მომხდარის უბრალო, მოულოდნელ კონფლიქტად წარმოჩენას და ამ გზით პასუხისმგებლობის შემსუბუქებას.

ოჯახი სხვა ვერსიების შემოწმებას ითხოვს

დაკავებული მამაკაცის აღიარების მიუხედავად, სტავროს გეორგიუს ოჯახი მიიჩნევს, რომ გამოძიებამ ყველა შესაძლო ვერსია უნდა შეამოწმოს.

საქმეში კვლავ რჩება კითხვები:

• ნამდვილად იყო თუ არა მკვლელობა მოულოდნელი კონფლიქტის შედეგი;
• წინასწარ იყო თუ არა თავდასხმა დაგეგმილი;
• მოქმედებდა თუ არა დაკავებული მარტო;
• ხომ არ არსებობდა მკვლელობის სხვა მოტივი;
• ხომ არ ჰყავდა დანაშაულს ორგანიზატორი ან დამკვეთი;
• იყო თუ არა მკვლელობა დაკავშირებული ადვოკატის პროფესიულ საქმიანობასთან;
• ჰქონდა თუ არა რაიმე კავშირი დანაშაულთან ადვოკატზე რამდენიმე კვირით ადრე განხორციელებულ სხვა თავდასხმას.

ოჯახი განსაკუთრებით იმ გარემოებაზე ამახვილებს ყურადღებას, რომ გეორგიუ სიკვდილამდე სულ რაღაც 19 დღით ადრე საჯაროდ საუბრობდა სხვა ინციდენტზე, რომლის დროსაც, მისი თქმით, სასწაულებრივად გადაურჩა სიკვდილს.

სწორედ ამ ფაქტმა თავიდანვე გააჩინა ვარაუდები შესაძლო შურისძიების, პროფესიული კონფლიქტის ან შეკვეთილი მკვლელობის შესახებ.

მოგვიანებით გამოძიებამ ყურადღება მიაქცია ვიდეოკამერების ჩანაწერებს, თითის ანაბეჭდებსა და დაკავებულის ჩვენებას, რამაც საქმე პირადი კონფლიქტის ვერსიისკენ მიმართა, თუმცა გეორგიუს ოჯახი მიიჩნევს, რომ ეს ვერსია საბოლოოდ დადასტურებულად ჯერ ვერ ჩაითვლება.

გამოძიება სხვა შესაძლო მონაწილეებსაც ეძებს?

საქმეში ერთ-ერთი მთავარი პასუხგაუცემელი კითხვაა, მოქმედებდა თუ არა ეგვიპტის მოქალაქე 28 წლის მამაკაცი მარტო.

გამოძიების ინფორმაციით, მკვლელობის შემდეგ ოფისიდან თანხა და ლეპტოპიც გაქრა. თუ ეს ინფორმაცია დადასტურდა, სამართალდამცველებმა უნდა დაადგინონ, იყო თუ არა ნივთების წაღება ეჭვმიტანილის თავდაპირველი მიზანი, თუ მკვლელობის შემდეგ გადაწყვიტა, ლეპტოპი და ფული წაეღო.

ასევე გასარკვევია, სად აღმოჩნდა მოპარული ნივთები და გადასცა თუ არა დაკავებულმა ისინი სხვა პირებს.

ამასთან, ოჯახის ეჭვი, რომ დანაშაულის უკან შესაძლოა სხვა ადამიანიც იდგეს, გამოძიებისთვის დამატებით კითხვებს აჩენს. თუ მკვლელობა წინასწარ იყო ორგანიზებული, უნდა დადგინდეს, ვინ დაგეგმა თავდასხმა და რა როლს ასრულებდა დაკავებული.

თუმცა ამ ეტაპზე სხვა ორგანიზატორის ან დამკვეთის არსებობა ოფიციალურად დადასტურებული არ არის.

როგორ დააკავეს ეჭვმიტანილი

გამოძიებისთვის ეჭვმიტანილის დასაკავებლად მნიშვნელოვანი აღმოჩნდა სათვალთვალო კამერების ჩანაწერები.

ერთ-ერთ ვიდეოში, რომელიც ადვოკატის ცხედრის აღმოჩენამდე რამდენიმე საათით ადრეა გადაღებული, ჩანს ორი მამაკაცი, რომლებიც ერთად მიდიან და მოგვიანებით იმ მრავალბინიან შენობაში შედიან, სადაც გეორგიუს ოფისი მდებარეობს.

ვიდეოჩანაწერების ანალიზის შედეგად გამომძიებლებმა მეორე მამაკაცის გადაადგილების მარშრუტი აღადგინეს და მისი ვინაობის დადგენა შეძლეს.

მნიშვნელოვანი აღმოჩნდა კრიმინალისტიკური ექსპერტიზაც. გამოძიების ინფორმაციით, ოფისში აღმოჩენილი თითის ანაბეჭდები 28 წლის ეგვიპტელის თითის ანაბეჭდებს დაემთხვა, რომელიც ბაზაში უკვე არსებობდა.

სამართალდამცველებმა ასევე ყურადღება მიაქციეს დაკავებულის ხელის ტრავმას. ზოგიერთი ინფორმაციით, მას მოტეხილობა ჰქონდა, რომელიც შესაძლოა ჩხუბის დროს მიეღო, თუმცა ესეც სამედიცინო ექსპერტიზამ უნდა დაადგინოს.

დაკავებულს საბერძნეთში დარჩენის უფლება არ ჰქონდა

ბერძნული მედიის ინფორმაციით, 28 წლის მამაკაცი საბერძნეთში უკანონოდ შევიდა და თავშესაფარი პირველად 2023 წელს მოითხოვა. მისი განაცხადი 2024 წელს უარყვეს, რის შემდეგაც მან კიდევ ერთხელ მიმართა შესაბამის ორგანოებს, თუმცა არც მეორე პროცედურის შედეგად მიენიჭა მას საერთაშორისო დაცვა.

გარდა ამისა, ადვოკატის მკვლელობის ბრალდებით დაკავების მომენტში მის წინააღმდეგ უკვე არსებობდა სასამართლოს მიერ გაცემული დაკავების ორდერი სხვა სისხლის სამართლის საქმეზე.

ERT-ისა და სხვა ბერძნული მედიასაშუალებების ცნობით, საქმე 2024 წელს არასრულწლოვანის მიმართ ჩადენილ სექსუალურ დანაშაულს ეხება. საქმის დეტალები ოფიციალურად არ გასაჯაროებულა და ამ ეპიზოდში მამაკაცის ბრალეულობა სასამართლოს საბოლოო გადაწყვეტილებით დადგენილი არ არის.

მიუხედავად ამისა, გამოძიებაში ცალკე საკითხად რჩება, როგორ აგრძელებდა თავისუფლად ყოფნას ათენში ადამიანი, რომელსაც საბერძნეთის ხელისუფლებამ თავშესაფარზე უარი უთხრა და რომლის დაკავებაზეც უკვე არსებობდა ორდერი.

როდის მოკლეს ადვოკატი

გამოძიების ვერსიით, სტავროს გეორგიუ 20 ივლისის საღამოს მოკლეს საკუთარ ოფისში, ათენის ცენტრში, 3 სექტემბრის ქუჩაზე.

მისი ცხედარი 21 ივლისს საღამოს აღმოაჩინეს, მას შემდეგ, რაც ადვოკატის არასრულწლოვანმა ქალიშვილებმა მასთან დაკავშირება ვერ შეძლეს და მამას ოფისში მიაკითხეს.

მეზობლის დახმარებით მათ ოფისის კარი გააღეს და გეორგიუ გარდაცვლილი იპოვეს.

ადვოკატს სხეულზე მრავლობითი დაზიანებები აღენიშნებოდა. სასამართლო-სამედიცინო ექსპერტის წინასწარი დასკვნით, სიკვდილი თავის მძიმე დაზიანებების შედეგად გამოწვეულმა ძლიერმა სისხლდენამ გამოიწვია.

ოფისში აღმოჩენილი ნივთები და ჩხუბის კვალი თავიდანვე ძალადობრივ დაპირისპირებაზე მიუთითებდა.

გამოძიება ჯერ არ დასრულებულა

28 წლის მამაკაცს განზრახ მკვლელობას ედავებიან. ის პროკურორისა და გამომძიებლის წინაშე უნდა წარდგეს, რომლებიც მისთვის აღკვეთის ღონისძიების საკითხს გადაწყვეტენ.

თუმცა, მიუხედავად დაკავებისა და მისი აღიარებისა, გამოძიებას კვლავ რჩება მნიშვნელოვანი კითხვები.

უნდა დადგინდეს, რამდენად შეესაბამება დაკავებულის ჩვენება ობიექტურ მტკიცებულებებს, რა იყო მკვლელობის რეალური მოტივი და მოქმედებდა თუ არა ის მარტო.

სტავროს გეორგიუს ოჯახი სწორედ ამ კითხვებზე პასუხების მიღებას ითხოვს და გამოძიების გაგრძელებას მოითხოვს.

დაკავება საქმის მნიშვნელოვანი ეტაპია, მაგრამ საბოლოო პასუხი ჯერ კიდევ არ არსებობს: იყო თუ არა ეს მართლაც შემთხვევითი კონფლიქტი, თუ ადვოკატის მკვლელობა უფრო რთული გეგმის შედეგია და ორგანიოზატორები სხვა პირები არიან?

ცნობისათვის: ბრალდებული დამნაშავედ არ ითვლება, ვიდრე მისი ბრალეულობა სასამართლოს საბოლოო გადაწყვეტილებით არ დადასტურდება.

შეგახსენებთ, რომ მოკლული ადვოკატი სტავროს გეორგიუ 2003 წელს საბერძნეთში გაუჩინარებული 11 წლის ქართველი ემიგრანტის, ალექს მესხიშვილის საქმეში ბრალდებულ ერთ-ერთ არასრულწლოვანს იცავდა.

ნინო ხოშტარია

ამავე თემაზე: ათენში მოკლეს ცნობილი ბერძენი ადვოკატი, რომელიც 11 წლის ალექს მესხიშვილის საქმეში ბრალდებულ არასრულწლოვანს იცავდა