„ქართული სპეცსამსახურებისთვის საიდუმლო ინფორმაციის გადაცემის“ ბრალდებით ჯავის მკვიდრი დააკავეს

ოკუპირებული ცხინვალის რეგიონის ე.წ. სახელმწიფო უშიშროების კომიტეტი (КГБ) იუწყება ჯავის რაინის მკვიდრის 1974 წელს დაბადებული კაცის დაკავების შესახებ, რომელიც „ეჭვმიტანილია ქართული სპეცსამსახურებისთვის საიდუმლო ინფორმაციის გადაცემაში“.

დე ფაქტო უწყების განცხადებაში ნათქვამია, რომ „სამხრეთ ოსეთის მოქალაქის“ საქმიანობა „აღიკვეთა“ რუსეთის ფედერალური უსაფრთხოების სამსახურთან და „სამხრეთ ოსეთის საგარეო დაზვერვის სამსახურთან“ თანამშრომლობის შედეგად.

დაკავებულის ვინაობა არ ხმაურდება. ირწმუნებიან, რომ ის ერთ-ერთი „სახელმწიფო საწარმოს“ თანამშრომელი იყო და „მჭიდრო კონტაქტს ინარჩუნებდა საქართველოს სახელმწიფო უსაფრთხოების სამსახურის წარმომადგენლებთან, რომლებსაც რესპუბლიკაში განლაგებული რუსული სამხედრო კონტინგენტის დისლოცირების, სპეციალური სამხედრო ოპერაციის ზონაში მათი გამგზავრების, ასევე სამხრეთ ოსეთის შიდაპოლიტიკური ვითარების შესახებ ინფორმაციას გადასცემდა“.

დაკავებულის წინააღმდეგ საქმე აღიძრა „სახელმწიფო ღალატის“ მუხლით. „მოცემულმა ფიგურანტმა აღიარა თავისი ბრალეულობა უკანონო ქმედებებში და აქტიურად თანამშრომლობს გამოძიებასთან“, - ნათქვამია დე ფაქტო უწყების განცხადებაში.

ე.წ კაგებე ირწმუნება, რომ „სამხრეთ ოსეთის კიდევ ხუთი მოქალაქეა გამოვლენილი, რომლებიც კონტაქტში იყვნენ საქართველოს სახელმწიფო უსაფრთხოების სამსახურის წარმომადგენლებთან და მათ გადასცემდნენ ინფორმაციას, რომელიც არ შეიცავდა სახელმწიფო საიდუმლოებას სამხრეთ ოსეთში სოციალურ-პოლიტიკური ვითარების შესახებ“.

დე ფაქტო უწყება მიუთითებს „სისხლისსამართლებრივი დევნისთვის საჭირო საკმარისი მასალების არარსებობაზე“. ამასთან დაკავშირებით ხუთ პირს „მიეცა ოფიციალური გაფრთხილება იმ ქმედებების დაუშვებლობის შესახებ, რომლებიც ქმნიან პირობებს რუსეთის ფედერაციის სისხლის სამართლის კოდექსის 275-ე მუხლით (სახელმწიფო ღალატი) გათვალისწინებული დანაშაულის ჩადენისთვის“.

თბილისში ე.წ. კაგებეს განცხადებასთან დაკავშირებით ჯერჯერობით კომენტარი არ გაუკეთებიათ.