უკრაინის თავდაცვის ძალებმა კიევსა და კიევის ოლქში ვერცერთი რუსული რაკეტა ვერ მოიგერიეს

კიევსა და კიევის ოლქზე რუსეთის მორიგმა მასირებულმა შეტევამ, რომელსაც დიდი მსხვერპლი და მასშტაბური ზიანი მოჰყვა, ისევ აჩვენა, რომ უკრაინას საჰაერო თავდაცვის საშუალებებით უზრუნველყოფის გადაუდებელი საჭიროება აქვს.

უკრაინის თავდაცვის ძალებმა ვერცერთი რუსული რაკეტა ვერ მოიგერიეს.

უკრაინის საჰაერო ძალების მიერ 5 აგვისტოს დილით გამოქვეყნებული მონაცემებით, ღამის განმავლობაში რუსეთის ჯარებმა გამოიყენეს 4 გემსაწინააღმდეგო და 24 ბალისტიკური რაკეტა და 115 უპილოტო საფრენი აპარატი.

დილის ცხრა საათისთვის დადასტურებული იყო 98 დრონის მოგერიება და ყველა რაკეტით და 17 დრონით პირდაპირი დარტყმა 26 ადგილზე.

უკრაინის პრეზიდენტმა ვოლოდიმირ ზელენსკიმ 5 აგვისტოს სოციალურ ქსელებში დაწერა, რომ კიევსა და კიევის ოლქზე რუსეთის მასირებული დარტყმის შედეგად 17 ადამიანი დაიღუპა და 44 დაშავდა. ზელენსკის ინფორმაციით, დარტყმის ძირითადი სამიზნე იყო სამოქალაქო საწარმოების საწყობები.

უკრაინის პრეზიდენტის თანახმად, მნიშვნელოვანია პარტნიორები აცნობიერებდნენ, რომ ბალისტიკური რაკეტების საწინააღმდეგო საშუალებების მიწოდების შეფერხება, ან მიწოდებისთვის მზადყოფნის არარსებობა ასეთ საშინელ მსხვერპლს და ნგრევას იწვევს.

ზელენსკის განცხადებით, ბალისტიკური რაკეტების დამჭერებს დღეს დაღუპულთა სიცოცხლის გადარჩენა შეეძლოთ.

უკრაინის პრეზიდენტმა იმ პარტნიორებს, რომლებიც მზად არ არიან უკრაინას უფრო აქტიურად დაეხმარონ საჰაერო თავდაცვის საშუალებებით, მიმართა, რომ შეუძლიათ ახალი სანქციებით დახმარება, რადგან რუსული ბალისტიკური რაკეტების წარმოების მნიშვნელოვანი ნაწილი დღესაც სანქციების გარეშეა.

უკრაინა დიდი ხანია რუსული ბალისტიკური რაკეტებისგან თავის დასაცავად ითხოვს დამატებით სისტემებს, განსაკუთრებით ამერიკული Patriot-ის რაკეტებს.

• 8 ივლისს ანკარაში, ნატოს სამიტის ფარგლებში უკრაინის პრეზიდენტ ვოლოდიმირ ზელენსკისთან შეხვედრისას აშშ-ის პრეზიდენტმა დონალდ ტრამპმა განაცხადა, რომ მზად არიან უკრაინას მისცენ საზენიტო სისტემა Patriot-ის რაკეტების წარმოების ლიცენზია.
• 28 ივლისს ზელენსკიმ ტრამპთან თეთრ სახლში შეხვედრის შემდეგ განაცხადა, რომ განიხილეს Patriot-ის რაკეტების წარმოების ლიცენზია.
• ამ შეხვედრიდან სამ დღეში ტრამპმა თქვა, რომ Patriot-ი განსაკუთრებული იარაღია და მისი წარმოების უფლების გაცემისას სიფრთხილე უნდა გამოიჩინონ.