სოხუმიდან მოსკოვში პაციენტებს სპეციალური რეისით გადააფრენენ

რუსეთის საგანგებო სიტუაციების სამინისტრო იუწყება რომ Ил-76-ის სპეციალური რეისით მოსკოვში გადააფრენენ ოკუპირებული აფხაზეთიდან ყველას, ვისაც კვალიფიციური სამედიცინო დახმარება ესაჭიროება.

„პაციენტების სანიტარულ ევაკუაციას საგანგებო სიტუაციების ავიაცია განახორციელებს", - ნათქვამია განცხადებაში.

ბორტი, ოკუპირებულ აფხაზეთში რუსეთის ჯანდაცვის სამინისტროს ხელმძღვანელთან მიხეილ მურაშკოსთან შეთანხმებით ჩაფრინდება, რომელიც სოხუმში გასულ კვირაში იმყოფებოდა. ამის შესახებ დე ფაქტო რესპუბლიკის ე.წ ჯანდაცვის მინისტრის მოვალეობის შემსრულებელმა ედუარდ ბუთბამ განაცხადა.

„მოსკოვში მათ კატასტროფების მედიცინის ფედერალური ცენტრის სასწრაფო დახმარების მანქანები დახვდებათ და სპეციალიზებულ სამედიცინო დაწესებულებებში მოათავსებენ. მსგავსი მოვლენა აფხაზეთის რესპუბლიკის თანამედროვე ისტორიაში არასდროს მომხდარა“, - განუცხადა მან ჟურნალისტებს.

მოსკოვმა ოკუპირებულ აფხაზეთში პოლიტიკოსებთან კავშირები 1 მარტს დანიშნული ე.წ. საპრეზიდენტო არჩევნების მეორე ტურის წინ გააქტიურა. რუსეთი ღიად ემხრობა ბარდა გუნბას კანდიდატურას. კერძოდ, მასთან სატელეფონო საუბარი გამართეს რუსეთის ეკონომიკის მინისტრმა მაქსიმ რეშეტნიკოვმა და რუსეთის ფედერაციის ვიცე-პრემიერმა ტატიანა გოლიკოვამ.

როგორც, რუსეთის სახელმწიფო საინფორმაციო სააგენტო ТАСС-ი იუწყება წინა დღეს რუსეთის პრეზიდენტის ადმინისტრაციის აპარატის უფროსის პირველმა მოადგილემ სერგეი კირიენკომ, რომელიც მანამდე სოხუმში იმყოფებოდა, რუსეთის რკინიგზის წარმომადგენლებთან შეხვედრა გამართა. შეხვედრაზე „შეთანხმდა რუსულ სირიუსსა და აფხაზეთის სოხუმს შორის რეგულარული ჩქაროსნული მატარებლის გაშვებასთან დაკავშირებული საკითხები“.

ამასთან, კომენტარი გააკეთა სოხუმის აეროპორტში რეგულარულ ფრენებთან დაკავშირებით.
„მას შემდეგ, რაც აეროპორტის სისტემის ფუნქციონირება შემოწმდა პირველი სატესტო რეისით, არსებობს სრული დასტური, რომ რეგულარული საჰაერო მიმოსვლა 1 მაისიდან შეიძლება დაიწყოს“, - თქვა მან.

სოხუმში ყოფნისას კირიენკომ საჰაერო მიმოსვლის საკითხი ბადრა გუნბასთან განიხილა და არა მოქმედ დე ფაქტო მეთაურთან, ე.წ. პრეზიდენტის მოვალეობის შემსრულებელთან ვალერი ბგანბასთან.