სასამართლომ ნიკა მელია „სასამართლოს უპატივცემულობის“ ფაქტზე დამნაშავედ ცნო

დაპატიმრებულ ოპოზიციონერ პოლიტიკოს ნიკა მელიას 6 აგვისტოს კიდევ ერთი ბრალდება წაუყენეს. თბილისის საქალაქო სასამართლოს მოსამართლე ნინო ელიეშვილმა იგი „სასამართლოს უპატივცემულობაში“ ცნო დამნაშავედ. კერძოდ, მას მოსამართლე თორნიკე ქოჩქიანისთვის სიტყვიერი შეურაცხყოფის მიყენებას ედავებოდნენ.

ოპოზიციური პარტია „ახალის“ თანათავმჯდომარე და „კოალიცია ცვლილებისთვის“ ერთ-ერთი ლიდერი, ნიკა მელია 2025 წლის მაისიდან პატიმრობაში იმყოფება. ვინაიდან იგი უკვე იხდის კიდევ ერთ 18-თვიან სასჯელს, მისი ადვოკატის, გიორგი კონდახიშვილის განმარტებით, სასჯელის შთანთქმის მექანიზმის გამოყენების შედეგად, მელიას პატიმრობის ვადა არ გაზრდილა და ის ციხეს 2026 წლის დეკემბრის ბოლოს დატოვებს, „თუკი მომავალში რაიმე ახალი სიურპრიზი არ იქნება“.

2025 წლის ივნისში მელიას ე.წ. წულუკიანის კომისიის წინაშე გამოუცხადებლობისთვის რვა თვით თავისუფლების აღკვეთა მიესაჯა. მიუხედავად იმისა, რომ იანვარში მელია უნდა გათავისუფლებულიყო, 2025 წლის ნოემბერში მას ერთი წლითა და ექვსი თვით თავისუფლების აღკვეთა მიესაჯა მას შემდეგ, რაც თბილისის საქალაქო სასამართლომ იგი სასამართლოს უპატივცემულობაში ცნო დამნაშავედ 30 მაისის ინციდენტთან დაკავშირებით, რომლის დროსაც მან დაძაბული სასამართლო მოსმენის დროს მოსამართლე ირაკლი შვანგირაძეს წყალი შეასხა.

მელია იმ რვა ოპოზიციონერ პოლიტიკოსს შორისაა, რომლებსაც საბოტაჟთან დაკავშირებით აქვთ ბრალი წარდგენილი. დანაშაულის დამტკიცების შემთხვევაში, მას ორიდან ოთხ წლამდე თავისუფლების აღკვეთა ემუქრება. სასამართლოს ამ საქმეზე განაჩენი აგვისტოში უნდა გამოეტანა, თუმცა მოსმენა შემოდგომამდე გადაიდო.

This post is also available in: