სავარაუდოდ, რუსული ნეონაცისტური ჯგუფის წევრებმა ქაშუეთთან წარწერა დატოვეს

Слава ДШРГ “Русич” – საღებავით შესრულებული ეს წარწერა მიწისქვეშა გადასასვლელის კედელზე, ქაშუეთის ეკლესიის წინ, რუსთაველის გამზირზე დაუდგენელმა პირმა დატოვა.

ვიდეო ერთ-ერთმა რუსულენოვანმა ტელეგრამ-არხმა გამოაქვეყნა.

ვიდეო ისეა გადაღებული, რომ კარგად ჩანს წარწერის დატოვების ადგილი.

ვიდეო “ოდიშის” ტელეგრამ არხზე.

ДШРГ “Русич” რუსული დივერსიულ-მოიერიშე სადაზვერვო ჯგუფია და ის რუსი ნეონაცისტებითაა დაკომპლექტებული. ჯგუფი რუსეთის ტერიტორიაზე მოქმედებს და მისი გაცხადებული მიზანია “რუსეთი მხოლოდ რუსებისთვის”, სწორედ ამიტომ, ნეონაცისტური ჯგუფის წევრები, რომელთა ბირთვს ნავარჯიშევი, დაკუნთული ახალგაზრდები შეადგენენ, დადიან საზოგადოებრივი ტრანსპორტით და ფიზიკურად უსწორდებიან ნებისმიერ არარუსს, რომელიც თვალში არ მოუვათ.

ამ ვიდეოს პარალელურად, ზემოთხსენებულმა ტელეგრამ-არხმა გამოაქვეყნა ფოტო, რომელზეც ასახულია თბილისში, გმირთა მოედანზე მდებარე უკრაინაში დაცემული ქართველი მოხალისეების ხსოვნის მემორიალის წაბილწვის ფაქტი, რაც სისხლის სამართლის დანაშაულია.

ვითვალისწინებთ რა, რომ შესაძლოა ამ ამბავს გმირი მეომრების ოჯახის წევრები და/ან ახლობლებიც კითხულობდნენ, არ ვაქვეყნებთ მემორიალის ფოტოს, თუმცა დავძენთ, რომ მემორიალთან უხვადაა სათვალთვალო კამერები.

ქვეყნდება მხოლოდ ვიდეო ქაშუეთის წინ მდებარე მიწისქვეშა გადასასვლელიდან.

ფეისბუქზე და სხვა სოციალურ ქსელებში, რუსეთ-უკრაინის ომში მყოფი და იქედან უკვე ჩამოსული ქართველი მეომრები, რიგითი მოქალაქეები, დაჟინებით ითხოვენ კამერების ჩანაწერების ამოღებას და დამნაშავეთა დაკავებას, წინააღმდეგ შემთხვევაში თვითორგანიზებით მათი მოძებნის პირობას დებენ.