ოკუპირებულ აფხაზეთში რუმინული ჯგუფის დაგეგმილ კონცერტს ბუქარესტის კრიტიკა მოყვა

რუმინეთის საგარეო საქმეთა სამინისტრომ მკაცრად გააკრიტიკა რუმინული ჯგუფის Morandi-ს მიერ 7 აგვისტოს სოხუმში დაგეგმილი კონცერტი და კიდევ ერთხელ დაადასტურა მხარდაჭერა საქართველოს სუვერენიტეტისა და ტერიტორიული მთლიანობის მიმართ.

„რუმინეთის საგარეო საქმეთა სამინისტრო მკაცრად არ ეთანხმება ჯგუფ Morandi-ს მიერ 7 აგვისტოს სოხუმში, საქართველოში, დაგეგმილ კონცერტს“, – განაცხადა სამინისტრომ X-ზე 6 აგვისტოს გამოქვეყნებულ პოსტში.

„მტკიცედ უჭერს რა მხარს არაღიარების პოლიტიკას, რუმინეთი ადასტურებს ურყევ მხარდაჭერას საქართველოს სუვერენიტეტისა და ტერიტორიული მთლიანობის მიმართ საერთაშორისოდ აღიარებულ საზღვრებში“, – დასძინა მან.

Morandi რუმინული პოპ დუეტია, რომელიც 2004 წელს მარიუს მოგამ და რენდიმ ჩამოაყალიბეს. 2 აგვისტოს მათ ბათუმში გამართეს კონცერტი.

This post is also available in: