კოლორადოში თავს დაესხნენ ებრაული თემის მიერ ორგანიზებულ მსვლელობას

სულ მცირე რვა ადამიანი დაშავდა ამერიკის კოლორადოს შტატის ქალაქ ბოულდერში, ებრაული თემის მიერ ორგანიზებული მსვლელობის მონაწილეებზე თავდასხმის შედეგად.

მსვლელობა პალესტინელთა რადიკალური ისლამისტური მოძრაობის, აშშ-ის და ევროკავშირის მიერ ტერორისტულ ორგანიზაციად აღიარებული ჰამასის მძევალთა მხარდასაჭერად 1 ივნისს მიმდინარეობდა. თავდამსხმელი დაკავებულია.

მსვლელობის მონაწილეებს აალებადი სითხის შემცველი ბოთლები დაუშინა კაცმა, რომელიც ფედერალური საგამძიებო ბიუროს ინფორმაციით, მოჰამედ საბრი სოლიმანია. ის ყვიროდა: „თავისუფლება პალესტინას”. ტელეკომპანია CNN-ის ცნობით, 2005 წელს სოლიმანი აშშ-ში თავშესაფარს ითხოვდა და უარი მიიღო.

თავდასხმის შედეგად მძიმე ხარისხის დამწვრობა მიიღო მსვლელობის რამდენიმე მონაწილემ. დაშავებულთა ასაკი 52-დან 88 წლამდეა. ამ ეტაპზე აშშ-ის ფედერალური საგამოძიებო ბიურო თავდასხმას ტერაქტად განიხილავს.

ისრაელის საგარეო საქმეთა მინისტრმა გიდეონ საარმა მომხდარს უწოდა „საშინელი ანტისემიტური ტერაქტი“.

• 2023 წლის 7 ოქტომბერს ჰამასის სამხედრო ფრთის დაჯგუფებები თავს დაესხნენ ისრაელის სამხრეთს, 1200 ადამიანი მოკლეს და 250-ზე მეტი მძევლად აიყვანეს.
• თავდასხმის პასუხად ისრაელმა ღაზის სექტორში დაიწყო ფართომასშტაბიანი სამხედრო ოპერაცია, რომელსაც დიდი მსხვერპლი და ჰუმანიტარული კატასტროფა მოჰყვა.