ინფორმაციამ გაჟონა - როგორი იქნება მამარდაშვილის ანაზღაურება ლივერპულში

გიორგი მამარდაშვილის ტრანსფერი ლივერპულში ახალი დეტალებით შეივსო. ბოლო ცნობებით, ინგლისური გრანდი ქართველი მეკარისთვის მნიშვნელოვნად გაუმჯობესებულ კონტრაქტს ამზადებს. მედიაში გავრცელებული ინფორმაციით, მამარდაშვილის ხელფასი ლივერპულში მინიმუმ ორჯერ, ხოლო გარკვეული წყაროების მიხედვით — შესაძლოა სამჯერაც გაიზარდოს იმ თანხასთან შედარებით, რასაც ვალენსიაში იღებდა.

სავარაუდო ანაზღაურება წელიწადში 3-4 მილიონ ევროს შეადგენს, რაც მის კარიერაში ერთ-ერთ უმნიშვნელოვანეს წინგადადგმულ ნაბიჯს ნიშნავს. ასეთი მაჩვენებლით ის საქართველოს ეროვნული ნაკრების ერთ-ერთ ყველაზე მაღალანაზღაურებად მოთამაშედ იქცევა.

შეგახსენებთ, რომ გიორგი მამარდაშვილი ლივერპულმა უკვე 2024 წლის ზაფხულში შეიძინა 35 მილიონ ევროდ, თუმცა გუნდის გადაწყვეტილებით, იგი კიდევ ერთი სეზონით იჯარით ვალენსიაში დარჩა — რაც კლუბისთვის სტრატეგიული ნაბიჯი იყო, როგორც მოთამაშის განვითარებისთვის, ასევე კონკურენციის მართვის თვალსაზრისით.

ოფიციალურად, ქართველი მეკარე ლივერპულს 2025 წლის 1 ივლისს შეუერთდება და გუნდთან ერთად მომდევნო სეზონისთვის მზადებას დაიწყებს. მოლოდინი დიდია — როგორც გულშემატკივრების, ასევე ანალიტიკოსების მხრიდან, რომლებიც მამარდაშვილის პოტენციურ როლს კლუბის შემადგენლობაში უკვე აქტიურად განიხილავენ.