ევროსტატის მონაცემებით, 2025 წელს ევროკავშირიდან გაბრუნებული მოქალაქეების რაოდენობით საქართველო მეორე ადგილზეა

ევროსტატის მიერ გამოქვეყნებული მონაცემების თანახმად, 2025 წელს ევროკავშირიდან საქართველოს 10,475 მოქალაქე გააბრუნეს, რის შედეგადაც  საქართველო ბლოკიდან გაბრუნებული მესამე ქვეყნის მოქალაქეების რაოდენობით მეორე ადგილზეა, თურქეთის შემდეგ (13,405).

ევროსტატის მეთოდოლოგიის თანახმად, „მესამე ქვეყანაში გაბრუნება“ გულისხმობს შემთხვევას, როდესაც ევროკავშირის არაწევრი ქვეყნის მოქალაქემ, რომელიც არალეგალურად იმყოფებოდა ევროკავშირის წევრ სახელმწიფოში, ოფიციალურად დატოვა ევროკავშირის ტერიტორია და გადავიდა იმ ქვეყანაში, რომელიც ევროკავშირის წევრი არ არის. ევროკავშირის მასშტაბით, 2025 წელს 135 460 ადამიანი გააბრუნეს, რაც 2020 წლის შემდეგ ყველაზე მაღალი მაჩვენებელია. თურქეთისა და საქართველოს მოქალაქეების შემდეგ, ევროკავშირიდან გაბრუნებულთა ყველაზე დიდი ჯგუფები იყვნენ სირიელები (8 370), ალბანელები (8 020) და რუსები (5 725).

წინა ორი წლის განმავლობაში საქართველო პირველ ადგილზე იყო. 2024 წელს ევროკავშირიდან საქართველოს 12 050 მოქალაქე გააბრუნეს, ხოლო 2023 წელს ეს მაჩვენებელი 10 360 იყო.

ამასთან, 2025 წელს, იმ მოქალაქეებს შორის, რომელთაც ევროკავშირის გარე საზღვრებზე შესვლაზე უარი უთხრეს, საქართველოს მოქალაქეები მეშვიდე ადგილზე იყვნენ, 4 785 უარით. აქედან 3 635 შემთხვევა საჰაერო საზღვრებზე, 1 125 შემთხვევა სახმელეთო საზღვრებზე და 25 შემთხვევა საზღვაო საზღვრებზე მოხდა. შესვლაზე უარის მაჩვენებლებით ლიდერობენ უკრაინის, ალბანეთისა და მოლდოვას მოქალაქეები.

ევროკავშირის მასშტაბით, 2025 წელს ევროკავშირში შესვლაზე უარი ეთქვა მესამე ქვეყნის 132 600 მოქალაქეს, რაც 7.1%-ით მეტია 2024 წელთან შედარებით. ბლოკში არალეგალურად მყოფი მესამე ქვეყნის 719 395 მოქალაქე გამოვლინდა, რაც წინა წელთან შედარებით 21.7%-ით ნაკლებია. ასეთი შემთხვევების ყველაზე დიდი წილი გერმანიაზე მოდიოდა (23.4%), შემდეგ მოდიოდა საფრანგეთი (22.2%), იტალია (11.5%), საბერძნეთი (8.5%) და ესპანეთი (8.2%).

This post is also available in: