აფხაზეთის დე ფაქტო საგარეო საქმეთა მინისტრი: საქართველომ უნდა გააუქმოს კანონი ოკუპირებული ტერიტორიების შესახებ

ოკუპირებული აფხაზეთის ახლადდანიშნულმა დე ფაქტო საგარეო საქმეთა მინისტრმა ოლეგ ბარციცმა განაცხადა, რომ საქართველომ უნდა გააუქმოს კანონი ოკუპირებული ტერიტორიების შესახებ და აფხაზეთთან და ცხინვალთან ძალის გამოუყენებლობის შესახებ შეთანხმებას უნდა მოაწეროს ხელი.

დე ფაქტო მინისტრმა რუსულ სახელმწიფო მედია საშუალება TASS-ს განუცხადა, რომ საქართველოს ხელმძღვანელობის განცხადებები აფხაზეთთან და ცხინვალის რეგიონთან, ასევე რუსეთთან ურთიერთობის გაუმჯობესების შესახებ მათი ყურადღების მიღმა არ დარჩენილა, თუმცა დასძინა, რომ „პრაქტიკული დადასტურებები, რეალური ნაბიჯებია საჭირო“. ასეთ ნაბიჯებს შორის მან დაასახელა ოკუპირებული ტერიტორიების შესახებ კანონის გაუქმება და განაცხადა: „ჩვენ უნდა გავითვალისწინოთ, როგორ აქტუალურ რეალობებში ვიმყოფებით“, და ასევე ძალის გამოუყენებლობის შესახებ შეთანხმების ხელმოწერა, რომელიც, მისი თქმით, ჟენევის ფორმატის მომდევნო შეხვედრებზე იქნება დაყენებული. „ამის შემდეგ შეიძლება სხვა რამეზეც ვისაუბროთ“, – განაცხადა ბარციცმა.

2008 წელს მიღებული საქართველოს კანონი ოკუპირებული ტერიტორიების შესახებ, რომელიც ქვეყანამ რუსეთ-საქართველოს ომისა და რუსეთის მიერ საქართველოს ორი ოკუპირებული რეგიონის დამოუკიდებელ სუბიექტებად გამოცხადების შემდეგ მიიღო, რუსეთის ტერიტორიიდან ოკუპირებული აფხაზეთისა და სამხრეთ ოსეთის რეგიონებში შესვლას დანაშაულად მიიჩნევს.

რაც შეეხება ძალის გამოუყენებლობის შეთანხმებას, საქართველოს ოფიციალური პოზიცია ის არის, რომ მან უკვე აიღო ძალის გამოუყენებლობის ვალდებულება 2008 წლის 12 აგვისტოს ცეცხლის შეწყვეტის შეთანხმებით და ამ შეთანხმების ერთგული რჩება.

გარდა ამისა, მაშინდელმა პრეზიდენტმა მიხეილ სააკაშვილმა 2010 წლის 23 ნოემბერს ევროპარლამენტში ცალმხრივი პირობა დადო ძალის გამოუყენებლობის შესახებ და ამის შესახებ წერილები გაეგზავნა გაეროს გენერალურ მდივანს, ეუთოს გენერალურ მდივანს და ევროკავშირის ლიდერებს, სადაც ნათლად წერია, რომ საქართველო მზად არის გამოვიდეს „ცალმხრივი ინიციატივით და განაცხადოს, რომ საქართველო არასოდეს გამოიყენებს ძალას, რათა უკუაგდოს რუსული ოკუპაცია და აღადგინოს კონტროლი ოკუპირებულ ტერიტორიებზე“. ამ ნაბიჯს ევროკავშირი მიესალმა. ანალოგიური ცალმხრივი დაპირებები გასცეს აფხაზმა და ოსმა ლიდერებმაც. საქართველომ, თავის მხრივ, მოუწოდა რუსეთს მსგავსი პირობა დაედო, რაც რუსეთმა არ გააკეთა.

57 წლის ბარციცი დე ფაქტო საგარეო საქმეთა მინისტრად ოკუპირებული რეგიონის ახალმა ლიდერმა ბადრა გუნბამ დანიშნა.

ასევე წაიკითხეთ:

• 14/04/2025 – გალუზინი: მოსკოვი თბილისთან დიპლომატიური ურთიერთობების აღდგენისთვის მზადაა
• 04/12/2024 – ზახაროვა: რუსეთი მზად იქნება ნორმალიზებისთვის იმდენად, რამდენადაც ამისთვის თბილისი იქნება მზად
• 18/09/2024 – ბოდიშის თაობაზე ივანიშვილის განცხადების შემდეგ ცხინვალი „პრაქტიკულ ზომებს“ ელის

This post is also available in: English (ინგლისური)