#OK! კაილი ჯენერს ახალი სასამართლო დავა დაემატა – ყოფილი დიასახლისი მას შეურაცხყოფასა და დისკრიმინაციაში ადანაშაულებს

კაილი ჯენერი კვლავ სამართლებრივი დავის ცენტრში აღმოჩნდა – მისი ყოფილი სახლის დამხმარე, ჰუანა დელგადო სოტომ, ამჯერად ლოს-ანჯელესის უმაღლეს სასამართლოში სარჩელი წარადგინა, სადაც ამტკიცებს, რომ რეალითი შოუს ვარსკვლავის გარემოცვაში მას „მკაცრი და შეუფერებელი მოპყრობა“ ჰქონდა.

სოტომ სარჩელი 2024 წლის 29 აპრილს შეიტანა. დოკუმენტების მიხედვით, ის ჯენერის სახლში დაახლოებით 2019 წლის მაისიდან მუშაობდა და ექვსი წლის განმავლობაში სახლის დამლაგებლის პოზიციას იკავებდა. სარჩელში კაილი ჯენერი, მისი კომპანია Kylie Jenner Inc., ზედამხედველი იტზელ სიბრიანი და სხვა დაკავშირებული კომპანიები არიან დასახელებული. ყოფილი თანამშრომელი მათ რასობრივ დისკრიმინაციაში, შევიწროებაში, შრომითი უფლებების დარღვევასა და ანაზღაურების არასწორ გადახდაში ადანაშაულებს.

სოტოს განცხადებით, მისი უშუალო ზედამხედველი, სიბრიანი, მას ხშირად ამცირებდა — დასცინოდა ინგლისურის გამო, ეძახდა „სულელს“ და აკრიტიკებდა მის ენას. სარჩელში ასევე ნათქვამია, რომ 2024 წლის ივნისში სიბრიანმა სოტოს მიმართ შურისძიება დაიწყო, მისი ანაზღაურება საათში 41.66 დოლარიდან 35 დოლარამდე შეამცირა, შეუცვალა სამუშაო გრაფიკი და შეამცირა ზეგანაკვეთური საათების შესაძლებლობა. სოტოს ადვოკატის განცხადებით, მისი კლიენტი „იმ გარემოში მუშაობდა, სადაც მას ღირსებას ართმევდნენ“ და სარჩელი მიზნად ისახავს იმ ემოციური და ფიზიკური ზიანის კომპენსაციას, რომელიც მან მიიღო.

კაილი ჯენერის გუნდის წარმომადგენლებმა განაცხადეს, რომ ჯენერს სარჩელი ჯერ არ უნახავს და კომენტარს ამ ეტაპზე არ აკეთებენ.

ეს არ არის პირველი მსგავსი შემთხვევა – რამდენიმე კვირით ადრე ჯენერს კიდევ ერთმა ყოფილმა დამლაგებელმა, ანჯელიკა ერნანდეს ვასკესმა, უჩივლა. ისიც მსგავს პირობებზე საუბრობს და ამტკიცებს, რომ სამუშაო გარემო „მტრული და დისკრიმინაციული“ იყო. ვასკესის თქმით, მას ხშირად დასცინოდნენ აქცენტისთვის და არასათანადო მოპყრობას უქვემდებარებდნენ მისი წარმომავლობის გამო.

სოტოს სარჩელში ასევე აღწერილია ფიზიკურად გადატვირთული სამუშაო რეჟიმი – მისი თქმით, ის ხშირად მარტო ასუფთავებდა მთლიან სახლს, ვერ იღებდა შესვენებებს და ზოგჯერ არც ანაზღაურება მიუღია სათანადოდ, მათ შორის 4 ივლისის დღესასწაულზე მუშაობისთვის.

დოკუმენტებში აღნიშნულია, რომ ჯენერის გუნდი ვერ უზრუნველყოფდა საკმარის პერსონალსა და სამუშაო პირობებს, რაც დამატებით ზრდიდა დატვირთვას თანამშრომლებზე.