DW-მ ევროკავშირის მიერ დაფინანსებული ქართულენოვანი საინფორმაციო სამსახური დააარსა

გერმანიის საერთაშორისო საზოგადოებრივმა მაუწყებელმა, Deutsche Welle-მ, 3 აგვისტოს Instagram-ზე ევროკავშირის მიერ დაფინანსებული ქართულენოვანი საინფორმაციო სამსახური დააარსა, რომლის გაფართოებაც მოგვიანებით სხვა პლატფორმებზეც იგეგმება.

ახალი სამსახური საქართველოს, ევროპისა და მთელი მსოფლიოს სიახლეებს გააშუქებს და აუდიტორიას აქტუალურ თემებზე „სანდო, ობიექტურ და დროულ ინფორმაციას“ მიაწვდის.

პროექტი ევროკავშირის მიერაა დაფინანსებული და „ევროპული საინფორმაციო ფარის ინიციატივის“ ნაწილს წარმოადგენს. ეს უკანასკნელი DW-სა და Fact-Checking and Media Literacy (FMM)-ის ერთობლივი პროექტია, პოლონეთის საერთაშორისო მაუწყებელ TVP World-თან ერთად. ინიციატივის მიზანია „დამოუკიდებელი ჟურნალისტიკის გაძლიერება და დეზინფორმაციის წინააღმდეგ ბრძოლა“ სამხრეთ კავკასიაში, განაცხადა DW-მ 21 ივლისის პრესრელიზში.

იმავე პრესრელიზის თანახმად, ქართულენოვანი სამსახური უფრო ფართო რეგიონული ძალისხმევის ნაწილია, რადგან FMM-მა სომხურენოვანი, ხოლო TVP World-მა აზერბაიჯანულენოვანი სამსახური დააარსა. სამივე პროექტი, სავარაუდოდ, თანამშრომლობასა და კონტენტის გაზიარებას გეგმავს, რათა რეგიონში დამოუკიდებელი ჟურნალისტიკის მასშტაბები გააფართოვოს.

ინიციატივა თავდაპირველად 18 თვის განმავლობაში დაფინანსდება, და DW-სა და FMM-ს შორის არსებულ, ევროპული თანამშრომლობის წინა პროექტებს, მათ შორის ENTR-სა და InfoMigrants-ს ეფუძნება.

გერმანულმა გაზეთმა Taz-მა განაცხადა, რომ ქართული სარედაქციო გუნდი ხუთიდან შვიდ ჟურნალისტს მოიცავს, რომელთა უმეტესობა გერმანიაში ცხოვრობს. მოსალოდნელია, რომ ერთი ჟურნალისტი მათ საქართველოდან შეუერთდება. გაზეთმა ზურა ყარაულაშვილი ქართულენოვანი სარედაქციო ჯგუფის ხელმძღვანელად დაასახელა.

აპრილის ბოლოს, პოლონეთის საზოგადოებრივმა მაუწყებელმა (TVP) ქართულენოვანი საინფორმაციო სამსახური VT Sakartvelo დააარსა.

This post is also available in: