31 მაისს, ბათუმში, ქუჩაში კაცის მკვლელობაში ბრალდებული დააკავეს – პროკურატურა

ბათუმში კაცის მკვლელობისთვის ერთი პირი დააკავეს.

საუბარია 31 მაისს მომხდარ შემთხვევაზე, როცა კაცს ქუჩაში, გამვლელების თვალწინ ცეცხლსასროლი იარაღიდან ესროლეს. ადგილზე მყოფებმა რამდენიმე გასროლის ხმა გაიგონეს.

დაზარალებული კაცი საავადმყოფოში მიყვანისთანავე გარდაიცვალა. გავრცელებული ინფორმაციით, ის ცოლსა და შვილს ელოდებოდა, რომლებიც მიმდებარედ, სილამაზის სალონში იყვნენ.

პროკურატურის ინფორმაციით, მკვლელობის მოტივი წარსულში მომხდარი კონფლიქტი გახდა.

პოლიციამ ბრალდებული მომხდარიდან 8 დღის შემდეგ, 8 ივნისს დააკავა.

“დაკავებულს ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა) და 236-ე მუხლის მეოთხე ნაწილით (ცეცხლსასროლი იარაღის და საბრძოლო მასალის მართლსაწინააღმდეგო ტარება) წარედგინა, რაც სასჯელის სახედ და ზომად 15 წლამდე თავისუფლების აღკვეთას ითვალისწინებს. პროკურატურამ ბრალდებულისთვის აღკვეთის ღონისძიების სახით პატიმრობის გამოყენების თაობაზე სასამართლოს უკვე მიმართა”, – ნათქვამია უწყების მიერ გავრცელებულ განცხადებაში.